1Ch 5 | NdeIBE | STEP | Amadodana kaRubheni izibulo lika-Israyeli (wayelizibulo, kodwa kwathi esengcolise umbheda kayise owomtshado, amalungelo akhe njengezibulo aphiwa amadodana kaJosefa indodana ka-Israyeli, ngakho kasalotshwanga emibhalweni yosendo njengelungelo lokuzalwa kwakhe,

1 Chronicles 5

URubheni

1 Amadodana kaRubheni izibulo lika-Israyeli (wayelizibulo, kodwa kwathi esengcolise umbheda kayise owomtshado, amalungelo akhe njengezibulo aphiwa amadodana kaJosefa indodana ka-Israyeli, ngakho kasalotshwanga emibhalweni yosendo njengelungelo lokuzalwa kwakhe, 2 lanxa uJuda wayelamandla amakhulu kulabo bonke abafowabo njalo enguye owazala umbusi, ilungelo lobuzibulo laya kuJosefa) –

3 Amadodana kaRubheni izibulo lika-Israyeli yila: nguHanoki, loPhalu, loHezironi kanye loKhami.

4 Abenzalo kaJoweli yilaba: nguShemayiya indodana yakhe, loGogi indodana yakhe, loShimeyi indodana yakhe, 5 loMikha indodana yakhe, loReyaya indodana yakhe, loBhali indodana yakhe, 6 kanye loBhera indodana yakhe, lowo uThigilathi-Phileseri inkosi yase-Asiriya eyamthumba yamusa ezizweni. UBhera wayengumkhokheli wabakoRubheni.

7 Izihlobo zabo ngosendo lwabo, njengokulotshwe emibhalweni yosendo yilezi: nguJeyiyeli induna, loZekhariya, kanye

8 loBhela indodana ka-Azazi, indodana kaShema, indodana kaJoweli. Bakha bahlala emmangweni osuka e-Aroweri kusiya eNebho laseBhali Meyoni.

9 Empumalanga babehlezi emmangweni ofika emaphethelweni enkangala etshaya khonale eMfuleni uYufrathe, ngoba izifuyo zabo zasezandile eGileyadi.

10 Ngezinsuku zokubusa kukaSawuli balwa impi lamaHagari; bawanqoba basebehlala emizaneni yawo emmangweni wonke ongempumalanga yeGileyadi.

UGadi

11 AbakaGadi babehlala phansi kwabo eBhashani, kuze kuyefika eSalekha:

12 UJoweli wayeyinduna, uShafama emlandela, besekusiza uJanayi loShafathi, ngaseBhashani.

13 Izihlobo zabo, ngokuzalana kwabo, yilezi: nguMikhayeli, loMeshulama, loShebha, loJorayi, loJakhani, loZiya kanye lo-Ebheri, beyisikhombisa sebendawonye.

14 Laba babengamadodana ka-Abhihayili indodana kaHuri, indodana kaJerowa, indodana kaGileyadi, indodana kaMikhayeli, indodana kaJeshishayi, indodana kaJahido, indodana kaBhuzi.

15 U-Ahi indodana ka-Abhidiyeli, indodana kaGuni, wayeyinhloko yemuli yakwabo.

16 AbakaGadi babehlala eGileyadi, eBhashani lemizaneni yakhona, kanye lasemadlelweni aseSharoni kuze kuyefika emaphethelweni awo.

17 Bonke laba balotshwa emibhalweni yosendo ngezinsuku zokubusa kukaJothamu inkosi yakoJuda loJerobhowami inkosi yako-Israyeli.

18 AbakoRubheni, labakoGadi lengxenye yesizwana sakoManase babelamadoda ayeselu-ngele ukubuthwa ayizinkulungwane ezingamatshumi amane lane lamakhulu ayisikhombisa lamatshumi ayisithupha amadoda ayeseqwahele esenelisa ukuphatha ihawu ahlome ngenkemba, atshoke ngemitshoko, ayesevele afundela ukulwa empini. 19 Bahlasela uHagari loJethuri loNafishi loNodabi.

20 Bahlonyulelwa ekulweni kwabo labo, njalo uNkulunkulu wanikela uHagari labanye bakhe ezandleni zabo, ngoba bakhuleka kuNkulunkulu empini. Wayiphendula imikhuleko yabo, ngoba bamethemba. 21 Bathumba izifuyo zako-Hagiri – amakamela ayizinkulungwane ezingamatshumi amahlanu, izimvu eziyizinkulungwane ezingamakhulu amabili lamatshumi amahlanu labobabhemi abayizinkulungwane ezimbili. Bathumba njalo abantu abayizinkulungwane ezilikhulu, 22 abanye abanengi babulawa, ngoba le kwakuyimpi kaNkulunkulu. Bona bahlala kulelolizwe kwaze kwaba yisikhathi bethunjwa.

Ingxenye Yesizwana SikaManase

23 Abantu ababeyingxenye yesizwana sikaManase babebanengi; bahlala elizweni kusukela eBhashani kusiya eBhali-Hemoni, kusitsho iSeniri (iNtaba yaseHemoni). 24 Laba yibo ababeyizinhloko zezimuli: u-Eferi, lo-Ishi, lo-Eliyeli, lo-Aziriyeli, loJeremiya, loHodaviya, kanye loJahidiyeli. Babengamadoda empi alezibindi, amadoda adumileyo, njalo beyizinhloko zezimuli zabo.

25 Kodwa bona babengathembekanga kuNkulunkulu waboyise basebekhonza onkulunkulu bezizwe uNkulunkulu wabo ababhubhisa kulawomazwe bengakahlali khona. 26 Ngakho uNkulunkulu ka-Israyeli wadunga umoya kaPhuli inkosi yase-Asiriya (okuyikuthi, Thigilathi-Phileseri inkosi yase-Asiriya), owathumba abakoRubheni, labakoGadi kanye lengxenye yesizwana sikaManase. Wabathatha wabasa eHala, leHabhori, leHara lasemfuleni uGozani, lapho abakhona lalamuhla.